Que é o Camiño Sen Límites

Que é o Camiño Sen Límites?

Son roteiros que, ao longo do percorrido, fan de fíos condutores ou de soporte á realización de diversas actividades en equipo. O  Camiño Sen Límites está baseado na atención á diversidade e a cooperación entre toda a comunidade.

Percorre parte do máxico camiño que une, pola beira do mar, a Costa da Morte, e que este ano 2019 comeza na capital de Galiza.

Está organizado pola Federación Provincial de ANPAS da Coruña -Costa da Morte  (integrada na Confederación ANPAS GALEGAS) en colaboración coa Asociación Deportiva e Cultural Rompendo Límites,  xunto co colectivo de estudantes  e profesorado Ciencia Sen Límites, asociacións de atención á diversidade, concellos, ao que se suman outros colectivos e persoas a título individual, posto que este é un proxecto colectivo aberto. 

No Camiño Sen Límites poden participar grupos de persoas diversos. A inscrición é de xeito individual ou colectivo a través de entidades deportivas, colectivos de atención á diversidade, ANPAs, asociacións diversas,… constando de varios roteiros que inclúen actividades como visitas a museos, interpretación ambiental, actividades socioeducativas,…en comunidade e coa colaboración de distintos ponentes, entre eles, alumnado de centros educativos, ecoloxistas, investigadores, artistas…

Organización Básica.

Contamos  coa colaboración dos concellos polos que pasan os roteiros, xunto ao concello de Carballo que tamén colabora con infraestrutura e furgoneta para coche escoba, transporte.
Necesitamos voluntariado técnico formado e outras persoas non necesariamente formadas, coordinadoras do camiño,… Contratamos 3 tipos de seguro (Resp. Civil, Accidentes de voluntariado e o individual de participantes).

É imprescindible contar con algo básico (sen iso é imposible pode organizar case nada):
Capacidade de compartir, ser empátic@s, estar abertos a aprender (de tod@s @s participantes) en cada roteiro, e ganas de pertencer a unha comunidade afectiva.

Como é concibido o Camiño Sen Límites?

É concibido como unha estratexia de atención á diversidade a longo prazo. A través do Camiño SenLímites colaboramos na visibilización da necesidade de abordar e responder á diversidade de persoas e sensibilizar na necesidade de reducir a exclusión dentro e fóra do sistema educativo.
Ou sexa, o obxectivo transversal do Camiño Sen Límites é permitir que todas e todos nos sintamos cómodos na diversidade na que vivimos, percibíndoa non como un problema, senón tamén como unha oportunidade para enriquecer as formas de ensinar, aprender e convivir.

O Camiño Sen Límites transformouse nunha alianza natural con diversos centros educativos, asociacións deportivo culturais, concellos ou  asociacións de atención á diversidade.  Estas asociacións promoven que a diversidade das persoas superen os obstáculos e dificultades para poder participar plenamente na vida da súa comunidade.

Son necesarias tantas alianzas?

Si. É necesario visibilizar que vivimos nunha realidade complexa que require apoios para que, entre todas e todos, de xeito cooperativo rompamos barreiras co obxectivo de conseguir unha sociedade máis equitativa e xusta; que permita vivir dun xeito máis independente e cómodo posible máis aló das limitacións e dificultades que teñamos. En resumo, iso é o Camiño Sen Límites.

Viki Rivadulla resume en poucas palabras que é o Camiño Sen Límites:
“Ademais de amosar a fermosura do noso patrimonio, sirve para socializar, para rachar barreiras e para dicir que, xunt@s, non hai límites”