22 de febreiro, presentación do inclusivo camiño Costa da Morte SenLímites

Queredes acompañarnos o 22 de febreiro no Ágora?

Temos a presentación do Camiño  Sen Límites que organizamos a Federación Provincial de ANPAS da Coruña-Costa da Morte (integrante da Confederación ANPAS GALEGAS) con varias asociacións como Rompendo Límites,  e moitismas máis como Íntegro, Un Paso Máis, APEM, Aloumiños,…que están outra vez nesta segunda edición Inclusiva.

Agardámoste ás 19:30 h. na aula 9 do local sociocultural Ágora  (R/ Lugar da Gramela, 17 | 15010 A Coruña). Pretendemos expor, con todas e todos vós,  a II Edición do Camiño  SenLímites que percorrerá o máxico Camiño da Costa da Morte, unindo Malpica e Fisterra pola costa.

Tríptico presentación camino  Senlímites

Estes 8 roteiros inclusivos (comezan o 11 de marzo e rematan o 17 de xuño) realizados en sábado pola tarde, ofrecen a posibilidade de gozar do contacto coa natureza descubrindo algunhas das paisaxes máis fermosas da nosa costa. Cada etapa do camiño poderá alcanzar unha lonxitude duns 9 kms e contará con voluntari@s de apoio, monitores, membros de protección civil,…

 Cada participante deberá inscribirse en cada etapa (próximamente abriremos unha ligazón á nosa páxina). A inscrición será gratuíta, só debe colaborar no pago do seguro (non superará o valor de 1 euro / persoa) en caso de que non estea asociado a un colectivo e / ou careza dun seguro de accidentes. Como moitos colectivos xa teñen o seu propio seguro, nese caso non necesita aportar ese euro.

A Federación Provincial de ANPAs da Coruña – Costa da Morte ten contratado seguros de accidentes de voluntariado e outro de participantes, ademais do seguro de Responsabilidade Civil.

Nesta inclusiva segunda edición do Camiño  senLímites (si, sen Límites porque… para que os imos poñer?) teremos a ocasión de gozar do tempo ao aire libre coñecendo algúns dos lugares de maior riqueza natural e inaccesibles, até agora, para a diversidade de  persoas que participemos.

Por iso, vemos interesante convocarvos a todas as entidades e colectivos interesados á reunión no centro sociocultural Ágora para falar deste roteiro Inclusivo e Participativo que, entre todas e todos,  seguro faremos atractivo e novedoso. E do que gardamos que na propia reunión no Ágora se sumen máis entidades á organización, posto que este é un proxecto colectivo aberto e desexamos que siga medrando.

Neste roteiros partillaremos experiencias en igualdade, un motivo da existencia deste camiño inclusivo. Porque este Inclusivo Camiño SenLímites dinos, e seguirá afirmando sempre, que nunca debemos perder o dereito a incluir, a compartir, ao recoñecemento da diversidade porque, senón, perderemos o dereito a ser libres.