Así foi a nosa concentración contra a LOMCE

A aprobación da chamada Lei de Mellora da Calidade Educativa (LOMCE) provocou grandes protestas na comunidade educativa. A  Plataforma Galega en Defensa do Ensino Público, na que están integradas  federacións de anpas, celebrou varias concentracións en sinal de protesta na que participaron pais e nais, alumnado, profesorado e sociedade no seu conxunto.

Ademais da celebrada na Costa da Morte (Carballo foi a localidade elixida para a nosa concentración) tiveron lugar outras en Compostela (Praza do Toural), A Coruña (Praza de Pontevedra), Ourense (Xefatura Territorial de Educación), Lugo (Subdelegación do Goberno), Vigo (MARCO), Pontevedra (Praza da Peregrina), O Barco de Valdeorras (Praza do Concello), Ferrol (Edificio Administrativo da Xunta) e Lalín (Praza do Aviador).

Na nosa comarca consistiu na lectura do manifesto, en forma de decálogo, lido por dez persoas integrantes da  comunidade educativa (nais e pais, alumnado, PAS e profesorado) onde se rexeitaba a LOMCE.

Na concentración amosamos, con voz alta e clara, o noso total rexeitamento a unha lei recentralizadora, clasista, reaccionaria, privatizadora, antipedagóxica, antidemocrática  e confesional, que liquida a igualdade de oportunidades, afonda nas diferenzas sociais  e expulsa do ensino aos sectores  sociais máis desfavorecidos  da sociedade.